ಕರಿಮಣೇಲು ಗಾಂಧಿ ನಗರದಲ್ಲಿ ವ್ಯಕ್ತಿಯ ಬರ್ಬರ ಕೊಲೆ  

ಬೆಳ್ತಂಗಡಿ: ವ್ಯಕ್ತಿಯೋರ್ವನನ್ನು ಬರ್ಬರವಾಗಿ ಕೊಲೆ ಮಾಡಿದ ಘಟನೆ ಬೆಳ್ತಂಗಡಿ ತಾಲೂಕಿನ ವೇಣೂರು   ಸಮೀಪದ ಕರಿಮಣೇಲು ಗಾಂಧಿ ನಗರ ದಲ್ಲಿ     ನಡೆದಿದೆ.

ಮೃತ ವ್ಯಕ್ತಿಯನ್ನು ಕರಿಮಣೇಲು ಗ್ರಾಮದ
ಗಾಂಧಿನಗರ ನಿವಾಸಿ ಸಂಜೀವ ಶೆಟ್ಟಿ
ಎಂದುಗುರುತಿಸಲಾಗಿದೆ. ಸುಮಾರು 60 ವರ್ಷ ಪ್ರಾಯದಇವರನ್ನು ಕಡಿದು ಕೊಲೆ ಮಾಡಲಾಗಿದೆ.ಸಂಜೀವ ಶೆಟ್ಟಿ ಇವರು

ಬೇರೆಯವರ ತೋಟಕ್ಕೆಕೆಲಸಕ್ಕೆ ಹೋಗುತ್ತಿದ್ದರು. ಇವರ ಜೊತೆ ಕೆಲಸಕ್ಕೆಹೋಗುತ್ತಿದ್ದ ಇನ್ನೋರ್ವ ಇಂದು ಬೆಳಗ್ಗೆ ತಡವಾದರೂ ಸಂಜೀವ ಅವರು ಏಕೆ ಬಂದಿಲ್ಲ ಎಂದುಅವರ ಮನೆಗೆ ತೆರಳಿದಾಗ ಈ ಘಟನೆ ಬೆಳಕಿಗೆಬಂದಿದೆ.
ಘಟನೆಗೆ ನಿಖರ ಕಾರಣ ಈವರೆಗೆ ತಿಳಿದುಬಂದಿಲ್ಲ.

ಕೊಲೆಗೆ ಸಂಬಂಧಿಸಿದಂತೆ ಕೂಡಲೇ  ಕಾರ್ಯಪ್ರವೃತ್ತರಾದ ಬೆಳ್ತಂಗಡಿ ವೃತ್ತ ನಿರೀಕ್ಷಕ ಶಿವಕುಮಾರ್ ಬಿ ಹಾಗೂ ವೇಣೂರು ಠಾಣಾ ಪೊಲೀಸರ ತಂಡ ಸಂಜೀವ ಶೆಟ್ಟಿಯವರನ್ನು ಕೊಲೆಗೈದ ಆರೋಪಿ ಶ್ರೀಶ ಶೆಟ್ಟಿ ಎಂಬವರನ್ನು  ಚಾರ್ಮಾಡಿಘಾಟ್ ಬಳಿ  ಪತ್ತೆ ಹಚ್ಚಿ ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಸಂಜೀವ ಶೆಟ್ಟಿ ಹಾಗೂ ಅವರ ಮಾವನ ಮಗನಾದ ಶ್ರೀಶ ಶೆಟ್ಟಿ ಎಂಬವರ ಮಧ್ಯೆ ಯಾವುದೋ ಕ್ಷುಲ್ಲಕ ವಿಚಾರವಾಗಿ ಅ.7 ರಂದು ರಾತ್ರಿ ವಾಗ್ವಾದ ನಡೆದಿತ್ತು. ಕುಡಿದ ಮತ್ತಿನಲ್ಲಿ ನಡೆದ  ಗಲಾಟೆ ತಾರಕಕ್ಕೇರಿದ ಪರಿಣಾಮ ಯಾವುದೋ ಮಾರಕ ಆಯುಧದಿಂದ ಆರೋಪಿ ಶ್ರೀಶ ಶೆಟ್ಟಿಯವರು ಸಂಜೀವ ಶೆಟ್ಟಿಯವರ ತಲೆಗೆ ಬಲವಾಗಿ ಹಲ್ಲೆ ನಡೆಸಿ ಹತ್ಯೆಗೈದಿದ್ದಾರೆ ಎಂಬುವುದಾಗಿ ತಿಳಿದುಬಂದಿದೆ.

ಹತ್ಯೆ ನಡೆದ ಘಟನಾ ಸ್ಥಳಕ್ಕೆ ಬಂಟ್ವಾಳ ಡಿವೈಎಸ್ಪಿ, ಬೆಳ್ತಂಗಡಿ ಸರ್ಕಲ್ ಇನ್ಸೆಕ್ಟರ್ ಶಿವಕುಮಾರ್, ವೇಣೂರು ಪೊಲೀಸರು ಹಾಗು ಬೆರಳಚ್ಚು ತಜ್ಞರು ಸ್ಥಳಕ್ಕೆ ಆಗಮಿಸಿ ಪರಿಶೀಲನೆ ನಡೆಸಿದ್ದಾರೆ.